Nuus van Missie Japan
Konnichiwa
Nuusbrief 2021
Liewe ondersteuner,
Die kleurtema van ons nuwe nuusbrief
is pienk, die kleur van die Sakura-blommetjie wat tydens lente hier in Japan
blom. Ons hoop dat hierdie helder kleur van nuwe lewe 'n bietjie vreugde in
elkeen se dag sal bring!
Ons kan elke dag sien hoe die
Sakura-blommetjies aan die bome vermeerder en hoe die koue in Japan begin
breek. Met elke nuwe blommetjie, bring dit weer nuwe hoop in ons harte.
Met hierdie hoop en gevoel van nuwe
lewe, stuur ons met vreugde in ons harte vir julle 'n nuwe nuusbrief.
Groot Nuus!
Geskryf deur Nadine
As 'n vrou sê dat sy groot nuus het,
dink almal dat sy swanger is, maar ek is ongelukkig nog nie swanger nie.
Alhoewel my begeerte om mamma te word daagliks toeneem, is dit nié die goeie
nuus nie.
Ons nuwe huis, waar ons vir die
volgende twee jaar sal vestig na afloop van ons besoek aan Suid-Afrika later
vanjaar, is op 23 Februarie tydens 'n vergadering met predikante van die
Shikoku-Ring en lede van die Missie Japan komitee bevestig.
ONS GAAN TOKUSHIMA TOE!
Die Tokushima gemeente, het toe die
gesprek opkom by die Shikoku-Ring, hul hand opgesteek en gesê dat hulle ons
graag by hulle wil hê. Is dit nie wonderlik nie?
Nog meer, Tobie en Annalie de Wet,
sowel as Stéphan en Carina van der Watt met hulle gesin, het voorheen as
sendelinge in hierdie presiese gemeente gedien. Wat beteken dat Tokushima
gemeente baie ondervinding met buitelandse sendelinge het. Ons, saam met Stéphan,
Carina en hul kinders sal in Mei-maand Tokushima gemeente besoek. Dit sal ons
eerste besoek aan
Tokushima wees. Ons amptelike datum
van vestiging in Tokushima is tans 1 Desember 2021.
DV Augustus sal ons Suid-Afrika vir
drie maande besoek. Ons sien daarna uit om saam met familie, vriende, kerke,
predikante en getuienisbediengsgroepe tyd te spandeer.
